Monday, March 31, 2014

أحمد السباعى

الكلام ده نقلاً عن صديقة أخت أحمد السباعى وبمعرفتها.
أتمنى تعملوا شير للوصول لكل اللى يقدر يعمل أى حاجة


تفاصيل حالة احمد محمد السباعي، صحيح ان احمد مش اخويا من امي و ابويا بس انا فعلاً اعتبره اخي الصغير. كل الناس إللي عندي تعرفني معرفة شخصية. يا جماعة انا بطلب المساعدة
أحمد...24 سنة في المستشفى في غيبوبة من يوم 5 ديسمبر بسبب حادثة. كان مروح من شغله من برج العرب مع زمايله الفجر في عربية الشغل وبسبب الشتا وسرعة السواق انقلبت العربية وخبطت في نخلة، اللهم لا اعتراض، أحمد أخد كل الضرر لأنه كان نايم في الكرسي الأخير من الميكروباص والسماعات في ودانه ماسمعش صاحبه وهما بيقولوا للسواق يحاسب في السرعة شوية. أحمد حب يلحق ينام شوية قبل مايروح وياخد ماما يوصلها لطنطا وبعدين يرجع تاني في نفس اليوم اسكندرية عشان يروح الشغل تاني بالليل
أصابة أحمد كانت كسر في الجمجمة، نزيف في المخ سبب تجمع دموي على المخ، 3 كسور في العمود الفقري و كسرين في الضلوع وكدمة في الرئة الشمال. اللهم لا اعتراض. بعد الحادثة على طول كان لسه فايق اداهم رقم ابن خالي عشان خاف على ماما تتعب وطلب منهم يخلوه يجيله وبعدها دخل في الغيبوبة. الحادثة كانت تقريبا 6 ونص الصبح، الاسعاف وصل بعد عناء ونقله على مستشفى العامرية العام للأسف وهناك اترمى لا حول له ولا قوة وصحابه عمالين يصرخوا في الدكاترة المعدومة الضمير عشان ينقذوه وكل اللي عملوه انهم نيموه على سرير وعلقوله محاليل وبس! سابوا النزيف في مخه والتجمع الدموي يزيد ويضغط على المخ ساعات لحد ما صحابه قدروا يلاقوا اسعاف عشان ينقلوه للمستشفى اللي هو فيها دلوقتي. أحمد وصل في حالة شبه منتهية وبدون اوكسجين بعد ساعتين ونص في حالة تشنج ودرجة وعي 4/15. الحمد لله قدروا يسعفوه في المستشفى وبعد الأشعات اكتشفوا النزيف واستدعوا الجراح وطبيب التخدير وعملوله جراحة لوقف النزيف وسحبوا التجمع الدموي اللي غطى تقريبا تلت المخ بس للأسف المخ متضرر جدا بسبب النزيف وبسبب نقص الأوكسجين من المخ بسبب نقله في اسعاف غير مجهز واللي كان على الاقل المفروض يتركبله انبوبة اوكسجين كأبسط حقوق الانسان في الحياة.
خلال الفترة اللي تقريبا وصلت لأربع شهور، أحمد قضى معظم الوقت في العناية المركزة، حمل جراحة شق حنجري، جراحة تثبيت للفقرات، ومن المنتظر ليه إن شاء الله يعمل جراحة تركيب أنبوبة تغذية من المعدة بدل من الأنف.
في الفترة دي رجة الوعي اتحسنت ببطء لحد ما وصلت مابين 9-10, دكاترة كتير في مصر قالونا إنه مستحيل يرجع وان إصابة المخ ضرت جزع المخ بدون مع إنه بيتنفس طبيعي وضغطه طبيعي. دكاترة كتير شافت إن أحمد مش هيفتح عينه تاني. بس الحمد لله أحمد فتح عنيه وببطء تجاوب معانا وبقت تقريبا طبيعية، شايفنا وحاسس بينا وعارفنا وساعات بيرد علينا بشفايفه لأنه من غير صوت بسبب الشق الحنجري. أنا عرضت حالته على 2خبراء في جراحة المخ، دكتور انجليزي في مستشفى ويلنجتون ودكتور ألماني في معهد المخ والاعصاب في هانوفر. الاتنين قالوا إن إحمد مش مريض "استنباتي" وإنه أمله الكبير بعد ربنا في التأهيل اللي كل ما كان أسرع كل ماكان أفضل.
أحمد حالته حصل فيها كتير بسبب عدم خبرة الناس بحالته. جاله تيبس في المفاصل بسبب قلة العلاج الطبيعي، قرحة وقطع تحت دراعه الاتنين قعد فوق الشهرين بيتعالج منها بسبب الحزام اللي كان لابسه.
بالنسبة لتكاليف العلاج، اللي أنا اعرفه ان احمد اعتبر اصابة عمل وتم عمل محضر بكده، والشركة بتدفع التكاليف في المستشفى لحد النهارده. اتكلمت معاهم عن موضوع التأهيل في مراكز تأهيل حالات نزيف المخ الأول قالوا مفيش مشكلة وبعدين لما عرفوا إنها ملايين قالوا الشركة مش هتقدر تتحمل ده. أنا كنت متوقعة وخصوصا إنهم دلوقتي عايزين ينقلوا أحمد القاهرة عشان يوفروا في التكلفة .
مفيش حاجة قدامي غير حملة تبرعات، اللهم لا اعتراض، انا مش متخيلة اني في موقف زي ده. بس أخويا انسان جميل بشهادة كل الناس، حب الناس ليه كبير
وعندي أمل في ربنا



Sunday, March 30, 2014

تأدَّب وخليك مهزأ

شباب 25 يناير التاهر البِرىء النكى اللى لا بيشتم ولا بيكسر حاجة
بيندربوا ويسكتوا عشان مؤدبين
وبعدين يتشتموا بأمهاتهم وأبهاتهم ويسكتوا عشان مؤدبين
والتليفزيون ليل ونهار طعن فى شرفهم وسلوكهم وهم برضه بيسكتوا عشان مؤدبين

هو أنا مش عارفة مين فهمكم إن الأدب إن الواحد يبقى مهزأ، بس واضح إنه حد لحس لكو إمخاخكوا
هتلاقيه نفس الشخص اللى علمكم إن البنت المؤدبة أما تتعاكس ويتقال لها كلام سافل فى الشارع تسكت
وإن النت المؤدبة أما مدرسها يعاملها غلط ويتري عليها ويهزأها قدام الفصل تسكت
وإن البنت المؤدبة لو زميلها فى الجامعة أو فى الشغل اتطاول عليها لايمكن ترد ... لإنها مؤدبة
وإن البنت المؤدبة لو حد ضايقها فى المواصلات تسكت ... لإنها لو زعقت فيه يبقى غلط خالص .. لإنها مؤدبة
وإن نفس البنت دى لما تتجوز، جوزها أهانها شتمها ضربها عمل اللى عمله، هى برضه تسكت، وبعدين ما هو أصلا لو عمل كده ما تلاقيها هى اللى وصلته لكده، هو يعنى هيعمل كده من نفسه؟

دلوقتى كمان مفروض إنى أسمع وأشوف وأعيش فى بلد إعلامها الرسمى بيخوننى ويشكك فى أخلاقى وسلوكى وشرفى، وبنفس الأدب أسكت ... أو لو يعنى خلاص هاموت لو مارديتش .. أرد بأدب

عشان حتى لو يعنى هم سفلة وفسدة وكذابين ومنافقين وأفاقين ومفتريين وبيطعنوا بالكذب والزور ... أنا برضه لازم أفضل مؤدبة

Friday, March 21, 2014

أمجاد وهمية

لكل مسلم شايف إن هو الصح، وبيعامل المسيحيين من علياء سعادته

هو انت متأكد ان لو أهلك كانوا مسيحيين كنت أسلمت؟
لو آه، يبقى يا إما أنت من الأقلية اللى فعلا بتفكر وبتحاول تعرف، يا إما بتضحك على نفسك وعلىّ
ولو لأ، يبقى اتلهى
عشان حتى لو فرضنا فرض جدلى إن الإسلام أكيد الصح والمسيحية أكيد غلط، يبقى برضه أنت ماليكش فضل فى ده، وماتعرفش ربنا هيحاسب إزاى
أنا شخصيا ماعرفش لو أبويا وأمى كانوا مسيحيين كنت فكرت فى الموضوع كده ولا لأ. أغلب الظن لأ


عبادة الظلم

بصوا فكرة


عشان تقدر تعرف انت فين بموقفك
تخيل ان كان فى وقت كان البنى آدم عشان ربنا خلقه أسود البشرة كان بيبقى عبد وكان الأبيض شايف ده عادى وهو ايه المشكلة واتولد على كده وماشغلش مخه. فى حين ان كان فى ناس بقى مختلفة وسألت وفكرت وقالت لأ
يا ريت كل راجل بينه وبين نفسه كده يقيم اللى شايفه حقوق وامتيازات على الست لمجرد ان هو مخلوق راجل وان هى مخلوقة ست
وكل واحد اكبر فى السن بيعامل الأصغر بمنتهى الامتهان لمجرد انه اتوجد على الأرض قبله بكم سنة
وكل واحد شايف ان مكان مولده او هويته اهله او اسم النادى اللى مشتركين فيه - اه والله فى ناس بتفكر كده - شايف ان ده سبب و مبرر منطقى انه يكون "أحسن وأحق بالأفضل" من غيره



فعلا أنت مش أحسن من غيرك
والله أنت مش أحسن من غيرك
الراجل مش أحسن ولا أحكم ولا أقدر ولا أى صيغة أفضل من الست



والكبير مش بالضرورة بيفهم عن الصغير


واللى أهله ماعرفش مين ولا اتولد مش عارفة فين مش أصيل أكتر من اللى لسبب ما قررت إنه مش زيك


اتنيلوا على عينكو بقى


وافتكروا كلامى ... هييجى يوم على الأرض الناس هتستغرب ان فى متعلمين متنورين كانوا مش قادرين يفكروا ان تعدد الزوجات ده شىء عجيب وضد المنطق وزيه زى ملك اليمين كده

Thursday, March 13, 2014

حالة حول جماعية


بحاول افكر
الإسلام - للمعتنقين والمؤمنين بيه - أقر بإن الست تكاد تكون هانم من هوانم المجرة
تطلب المهر اللى تعوزه ومحدش له يقول لها كتير ولا هتعملى بيه ايه
ماتجيبش بتعريفة حاجة فى بيت الزوجية على انها تتجوز فى البيت اللى يقدر جوزها يجيبه طالما هى رضيت بيه وبإمكانياته
لا تنضف ولا تغسل ولا تطبخ، ويتجاب لها شغالة تخدمها، ولو عملت كده لها الشكر وكتر خيرها
لما تولد ومش عايزة ترضع، محدش له يجبرها ولو عملتها لها أجرها، ما اخديتوش فى الدنيا تاخده فى الاخرة
مالها سواء من ورث او عمل او اى شىء لها ومحدش يسألها ولا يطلبه منها، وعشان كده الذكر بيورث ضغفها
اسمها هو اسمها وهويتها مش بتتغير ولا بتتحسب على جوزها
القرآن والسنة مالييانين قصص عن اللى كانت ملكة واللى كانت تاجرة واللى واللى
ازاى وامتى اتحول للى احنا فيه ده مش عارفة، والأنأح ان كله بإسم الدين، الإسلام تحديدا
منين طيب؟
ولا حول ولا قوة إلا بالله

Sunday, March 9, 2014

عن شتايمنا العنصرية


فى نقطة بس مهمة فى الموضوع، اه المقصود الإهانة فى الحالتين سواء تشبيه الراجل بست أو العكل. بس هتلاقى ان تشبيه الراجل بست إهانة لإنه ضمنيا كده بقى أقل رجولة بإنه بقى ست لإن الست أقل. إنما تشبيه الست براجل فيه انتقاص من أنوثتها فى نظر الرجالة وده يخليها أقل ولا يحتوى إن الراجل أقل خالص ... فاهم قصدى؟

باسم يوسف ... المرأة ... والدم الخفيف

كنت من أشد معجبى باسم يوسف فى أوائل شهرته، على موقع اليوتيوب، وبدأت افقد الإهتمام به شيئاً بشىء إلى أن توقفت تماما عن المشاهدة العام الماضى
شاهدت - بعد معرفتى أن المحتوى يتناول أمانى الخراط - الحلقة الأخيرة، وتوقفت عند بعض النكات المتعلقة ب “الخبرة .. الترقيع” ثم نكات أخرى خاصة بشريف مدكور والمثلية الجنسية.



لست من محبى احتكار الضحك، واعتبار ما لايضحكنى بالضرورة سخيف، فذوق البشر مختلف، وهذا أمر طبيعى. لكن على تقديرى لإختلاف البشر، سأظل لا أحترم من يشبهون الرجل بالمرأة رغبة فى امنتهانه، ومن يشيرون فى كلامهم عن المرأة المتعددة العلاقات كرمز للخبرة الملتوية وال”بوظان” ومن يحصرون المرأة فى نكاتهم فى كونها وعاء جنسى - نعم هذا الكليشيه المكرر - لا فائدة منه غير النظر له والرغبة فيه والممارسة معه، وان لم أمارس معها إذن فأستطيع التشكك فى شرفها وأخلاقها وإضحاك البعض .. فأنا ساخر ضاحك


لست من هواة المقدسات، ولا أرى - عدا الله سبحانه وتعالى - ما يستحق التقديس على هذه الأرض، ومفاهيم الأمس التى كانت فوق النقد والسؤال، هى أمور عادية اليوم. لكن هناك بعض الأخلاقيات التى وإن لم تكن “مقدسة” إلى أنها تُعلى من شأن الإنسان، وغيابها يؤدى بالناس إلى مستوى متدنى من الحقارة والتعامل الغليظ


لم أشعر مثلا بأى امتهان من انتاق أمانى الخياط، لأنه نقد وسخرية اعتمدت على كونها انسانة تعمل كإعلامية،  وسخرية من نتاقض مواقفها واسلوب خطابها، لم يتطرق الأمر لكونها أنثى تحديدا، وهو الأمر المثير للغضب

دعونا نترك جانبا كل تعبيرات “حقوق المرأة” و”المساواة” وما شابه من كليشيهات فقدت أهميتها بسبب تكرارها ممن لا يعنوها ولا يؤمنون بها، كيف نتخيل الأرض ونصف سكانها يحتقرون النصف الآخر؟


دعونا نعود إلى كليشيه آخر ونُذكِر كل رجل يمتهن المرأة فى نكاته أنه سيأتى اليوم وتكون ابنته قرة عينه 
سخرية من لا يراهم هو جديرين بها.
حقا لا أفهم الرجال
يعيش مراهقته لا يرى فى المرأة سوى جسدها
ثم فى شبابه يبحث عن عذريتها ليتزوجها
ووبعد زواجه، يتعامل معها بكل احتقار وامتهان
ثم تأتى ابنته للحياة ليطالب بأن تكون هى استثناء هذه القاعدة .. لماذا؟ لأنها ابنته


أحياناً أذهب بعقلى إلى مشهد من فيلم قصير، يسخر فيه بعض الرجال من جسد امرأة لتستدير فتكون ابنة أحدهم، وأغضب تماما حين أتخيل رد فعله


ليس هناك أى شىء مضحك فى أن يُشبه الرجل بالمرأة
ولست ذو “دم خفيف” حين تشير إلى تعدد علاقات المرأة و “الترقيع، والخبرة


لقد فقدنا الأمل فى انسانيتكم واحترامكم لأنفسكم، أتركونا من نكاتكم

إن كان صعب عليكم احترامنا، فعلى الأقل دعونا وشأننا