إلى احمد رجب وامثاله ... ألا تخجلون؟

أحمد رجب - نص كلمة اليوم  الثلاثاء 29 مايو 2012

لم يعد أمامنا غير أحمد شفيق ومحمد مرسي. مرسي؟ كيف اختار مرشحا لم تثق فيه جماعته بالدرجة الأولي فرشحته بديلا للشاطر إذا تعذر ترشيحه. ليس أمامي إلا شفيق، (وكيف اثق فى مرشح كنت انا نفسى من اللى هتفوا ضده قدام مجلس الوزراء وانضرب الثوار واعتصموا لحد ما اتشال؟) وكل الحملات الظالمة ضده هي التي دفعته إلي فوق، فالشعب ذكي ولماح ويعرف المفتري من المفتري عليه،(زى ما طبعا الشعب عارف انه كان مسئول عن الحكومة وقت موقعة الجمل اللى اقل حاجة كان فى اى بلد محترم المسئولين بيستقيلوا و يخرسوا خالص لكن ده بكل بجاحة كمان مترشح لرئاسة الجمهورية) قالوا شفيق سيعيد مشانق العهد البائد، وهل كان في العهد البائد علي كل - سوءاته - مشانق مبالغات (ﻷ خالص كان فى مبانى ﻷمن الدولة ياما اتعذب فيها شباب احسن منك و من امثالك، وكان فيها السجون و المعتقلات اللى اتعذب فيها رجال قالوا ﻷ فى المحلة لما طالبوا بحقوقهم فى اكتر تفاعل شعبى سلمى و هو الإضراب عن العمل وردية معتصمة و وردية بتشتغل عشان الانتاجية ماتقفش، و برضه عذبوهم و منهم كانوا صحابى اللى منهم اللى لسانه فضل واقف و منهم اللى دراعه ماكانش بيتحرك من الكهربة) تراكمت علي رجل قوي، ذكي، ناجح في كل مهمة مارسها (طبعا تاريخه كله نجاح، ويُسأل فى ذلك زملائه دفعته اللى بيحكوا عن سرقته و فساده هوايل)  ولم يبق أمامنا غيره لكي يخلص مصر من خنقتها، فلول؟ وهل كل من خدم الدولة فلول؟ ( ﻷ بس كل من سرق و نهب و سف من مالها و ساعد حبايبه انهم يسفوا منها و باعها بالرخيص عشان يستفيد هو و صحابه ولاد صحابه فلول) نفترض جدلا أنه فلول، ألم يكن خالد بن الوليد من كفار قريش وقتل المسلمين في »أحد« ثم أصبح سيف الله المسلول ( انت بجد قلت كده؟؟ جات لك الجرأة انك تنافق للدرجة دى من الإبتذال؟ اخس على كده)

هل أمامنا في الإعادة من ينقذ مصر غير شفيق ؟

انت مفيش قدامك حاجة يمكن، لكن شباب البلد دى الحر يرفض انه يتملى الإختيارات منك و من امثالك من الشلة اللى نهباها و واكلاها و نرفض انك تستخدم ديننا فزاعة عشان تنافس اللى بيستخدم ديننا دعاية … انتوا الاتنين زى بعض … انتوا الاتنين ﻷ

انا فكرت كتير ايه اللى يخلى واحد يقول كلام من ده. اصل مش ممكن تكون الفلوس بس لان الفلوس مهما كترت ماتفسرش كل النفاق الباين الواضح ده

يمشكلة امثالك انهم "منفسنين" علينا

عارفها الكلمة دى؟

مش طايقين ان "شوية العيال" رافعين راسهم بعند غصب عنك و عن امثالك و رافضين يطاطوا لكيان ماعليش فيه غير اللى وطى و خد على دماغه و سكت

مش مستحملين شكلكوا قدام نفسكوا و انتوا شايفين شباب زى الورد طبق الكلام اللى انتوا كنتوا بتقروه و انتوا مراهقين عن ابطال مش خايفة من الموت عشان بلدها تبقى احسن

هتطق يا عينى انت واللى زيك... احنا برضه غلطانين، احنا كان مفروض نكذب و نقول ان امثالك الهمونا للحرية و اننا اما قرينا كلامك عرفنا اننا ﻻزم نثور. ساعتها كنت طبعا هتطبل للثورة و تبقى اول واحد يشاور و يقول فلول

انا عارفة ان مفيش ضمير احتكم اليه، بس كل اللى نفسي اسأله يعنى وانت فى السن ده لك انت واللى زيك

أﻻ تخجلون؟

يسقط الرئيس القادم

اه امال انتوا فاكرين ايه؟

اخترناه و بايعناه ولا ايه؟

اللى بنختاره دلوقتى مش اله ولا قائد عام لمجريات الأمور فى مصر. احنا بنختار رئيس قاعد هم اربع سنين و بعدين هانشوف نختار مين بعديه.

بلاش صناعة الآلهة من دلوقتى ارحمونى

عشان كده انا مش قلقانة ولا متوترة. ايا كان الرئيس القادم مين اصلا لازم يبقى عارف انه خلاص … عصر ال... راح خلاص

حتى لو كان اللى انا مختاراه، برضه لو عمل كده ولا كده مش هنسيبه.

ومحدش يقول لى عجلة و استقرار. الكلام ده انتهينا منه. بلدنا و بلد عيالنا مش هينصلح حالها لو ليها نصيب فى الصلاح لو احنا مستسهلين و تانى عايز واحد ييجى يركب و احنا نلومه على كل و اى حاجة مش عاجبانا... لأ … البلد دى بلدنا و مش هنسيبها لحد تانى بقى. كفايانا السلبية و الاتكال ان الحكومة هى بابا و ماما و نرمى عليها عبىء كل احباط فى حياتنا عشان نريح نفسنا من اننا نبقى مطالبين قدام روحنا اننا نتعب و نحاول مرة و اتنين و عشرين

والنكتة فى الموضوع كمان ان اصلا اساسا يعنى احنا مانعرفش صلاحيات الرئيس ده ايه. يعنى احنا ممكن نكون حاليا فى الساعات دى بنختار ملكة انجلترا و ممكن نكون بنختار امبراطور الالفية...ليسة مانعرفش

قدامنا معركة الدستور، و خناقة مهمة جدا محدش بيتكلم فيها و هى المحليات. المحليات يعنى كل الخدمات اللى الإخوان متبرعين بيها واللى لو اتقدمت للناس صح يبقى انضربوا فى مقتل، المحليات يعنى صفقات الطرق و شركا النظافة اللى تعدى كل قضايا اهدار المال العام و تقف تنافس على المركز الأول، المحليات اللى مخلية تلات اربع الناس مش طايقة نفسها من كل المظاهر السيئة اللى فى الشارع المصرى.

ليسة قدامنا كتير اوى.

وهم تلات سنين بالضبط ان شاء الله... و هنلاقى حملات انتخابية جديدة عشان بنختار رئيس تانى

قولوا من قلبكم ولا يهمكم … يسقط الرئيس القادم

والمجد... كل المجد، لكل شهيد، وكل مصاب، وكل اسير فى السجون

كل بنى آدم اتصاب مرة و نزل تانى

كل اخ فقد اخوه و نزل يكمل بعده

كل ام فقدت ابنها و فضلت تدعى مع الثورة

ادعوا للغلابة، الغلابة اللى شكلهم مش بيعجب وهم عرقانين و تعبانين، وهم بيموتوا حتى.

ادعوا للى بتقولوا عليهم همج عشان مخدوش فرصة يتعلموا يتكلموا و ياكلوا و يتصرفوا زيكم

ادعوا للى بتقولوا عليهم بلطجية اللى لولا واحد فيهم يوم 28 كان زمانى يا مصابة يا ميتة

عشان لولاهم كان زماننا دلوقتى ليسة بنتفرج على لجنة السياسات وهى بتحيى رئيس مصر الجديد جمال مبارك

لولاهم كان زمان اللى فاضل فى البلد سوزان بتقسمه بين حبايبها

عارفة ان اللحظة مش بتلمع، وان الاختيار ساعات شكله بيبقى ماسخ، وان الجو العام بقى محبط جدا … بس ماتنسوش انتوا عملتوا ايه برضه، وكملوا

وان شاء الله هنكمل يعنى، احنا ورانا ايه؟

و الثورة - ان شاء الله و غصب عن الكل - مستمرة

الحرية لنورا الجيزاوى و بقية المعتقلين السوريين

الحرية لنور الجيزاوى

وبقية المعتقلين السوريين فى سجون بشار الأسد

 

هذه الصورة ضمن حملة التضامن مع المعتقلين السوريين

رابط الحملة على الفيسبوك

 

صفحة الحرية لنور الجيزاوى على الفيسبوك

ليسة جاية فى دماغى النهاردة

من سنتين فى اكتوبر 2010، نظمت دويتش فيله الملتقى الأول للمدونين العرب الألمان و كان فى القاهرة لمدة ثلاث ايام.

النهارة حبيت اهنى المدونين العرب اللى شاركوا اللى اتجوز منهم كتير

كان فى الأول المدون المغربى مصطفى البقالى، اللى اصبح اب لتوأم ما شاء الله الآن ايضا

ثم المدونة الفلسطينية اسماء الغول اللى منتظرة مولودها الآن يعطيها العافية و الصحة يا رب

ثم تزوجت انا فى مارس الماضى

و آخر المنضمين كان المدون الأردنى اسامة رمح اول هذا الشهر

الف مبروك و عقبال ياسين و جمال و طارق

والف شكر لزاهى و ماتياس المنظمين اللى سهلوا علينا التجربة، ووفروا لنا كل المساعدة

الاستنخابات 1

هو انا مش عارفة رايحة فين ف الآخر بالكلام ده بس قررت افكر بصوت عالى عشان اساعد نفسى ارتب افكارى و منها يبقى خدنا وادينا سوا.

اولا الثورة ثورة والسياسة سياسة، والجنس خشن خشن والجنس الناعم ناعم. الثورة غير السياسة خالص حتى لو سياسة الثورة او سياسة ما بعد الثورة. وده واقع انا شخصيا اخترت اعترف بيه و اتعامل معاه و اللى عايز يرفضه من حقه تماما وما اقدرش اقول عليه غلط.

يعنى محددات الأمور فيما يتعلق بالثورة اصلا بعيدة عن السياسة. السياسة مؤسسة مكونتها غير الثورة.

الثورة فورة راديكالية * قاطعة حاسمة رافضة للحلول الوسط مؤمنة بالأسود والأبيض...

السياسة كيان مؤسسى يعمل على الموازنات واستتاب الأمور و ماهو يحقق اكثر بتكلفة أقل فداحة

ومن غير ما نقول يع على السياسة، احنا اصلا ماعرفناش نعمل ثورة لا من منطلق قانونى تشريعى، ولا اجتماعى، ولا اقتصادى، فطبيعى جدا مش السياسة هى اللى هاتكون شاذة عن القاعدة وتيجى السياسة هى اللى تقلب ثورية.

#مقاطعون

رغم رفضى للمقاطعة كمبدأ عام وتحديدا فى الانتخابات دى، لكن انا فاهمة كويس اوى المقاطعين وماقدرش الومهم. انا نفسى فى اختيارى لشغلى اما لقيت المجال الطبى فى مصر هزلى بشكل لا احترمته ولا حبيت اكون جزء منه، بعدت عنه تماما.

حتى الآن مش ندمانة على القرار ده، رغم انه فى عين كثير من الناس واحدة لقيت القواعد مش عاجباها فقالت مش لاعبة بدل ما تتعبت فى انها تغير اللى مش عاجبها... وهى برضه وجهة نظر تحترم.

ف الآخر بتبقى عملية ايه اللى كل واحد فينا شايفه يستاهل التعب، وايه اللى كل واحد فينا يقدر يتعب فيه و بيه.

يمكن بس مش قادرة اتسامح اوى مع فكرة ان حد يقدر ينسى ان فى ناس دفعت و ضحيت فوق الكلام عشان نقول "يسقط يسقط حسنى مبارك" ونجيب واحد تانى.حتى لو قلبت حوار ومابقيتش باللمعان اللى كنا عايزينه ماينفعش نرميها فى وشهم ونقول لهم لا مش مقامنا النص حرية دى.

#كيف تختار رئيسا

زى ما قلنا قبل كده، السياسة مش شغلة نقاء و صفاء و مثاليات، شئنا ام ابينا. الرك بس على انهى كذبة جاية على هوايا، و طالعة بشكل شيك يعجبنى لو انا بتاعت شياكة، جهورى لو انا بتاعت كده ... الخ

اختيارات اغلينا منصبة فى احنا مش عايزين مين اكتر ما هى احنا عايزين مين. واللى لقى نفسه مش عايز ولا واحد قال هايقاطع.

جوزى دايما اما بيلومنى انى عاطفية بشكل عام، بيفكرنى ان اسوأ قرار دايما هو اللى مبنى على الخوف، لانه غالبا ما بيكون قرار غلط... اذا كان ينفع يتقال عليه قرار اصلا.

احنا مانخافش من الفلول، احنا نرفضهم و نرفضهم سياساتهم

ومانخافش من الإسلاميين العنصريين لكن نرفضهم و نقاوم دكتاتوريتهم

مين المنافسين بشكل واقعى دلوقتى؟ موسى و ابو الفتوح وبعدهم فى الصف التانى حمدين وشفيق ثم خالد على بترتيب اساميهم.

معلهش مفيش حاجة اسمها مرشح الثورة، لان الثورة دى احنا اختارنا مايكونش لينا ممثل اصلا و كافحنا عشان ده فماينفعش دلوقتى نقول فى مرشح ثورة.

معايير اختيارى انا ايه؟

اول حاجة، انى طول عمرى متعقدة من ان البلد دى مش عارفة تبدأ حاجة و تكملها عدل. حاجة زى كيانات مؤسسية فيها بشر تعمل حاجة و تكمل و تبقى ناجحة مع بعض.

كل ما ننظم بطولة رياضية لازم نعكعها

الشركات  والمصانع و و و

اكتشفت فى مرحلة معينة انى – عن دون قصد – بقيت مهتمة جدا بمتابعة الحملات الانتخابية اكتر من المرشحين، وان ده كان واحد من اهم المعايير اللى ساعدتنى فى اختيار المرشح الرئاسى المناسب ليا.

خالد على عامل زى مصريين كتير بيفقعوا لى مرارتى. جاى بعد ما البلد بقالها سنة فيها مرشحين بيشتغلوا ويقوم يفتكر يرشح نفسه. ويرجع يقول انه ماعهوش ميزانية و شغل تطوعى والكلام ده.

نفس اعذار كتير من اللى مش واخدين شغلهم بجد فى مصر: مفيش فلوس، مفيش وقت

امال بثينة كامل بقى تقول ايه؟ اهى دى واحدة كانت فعلا شبه واثقة ان فرصتها تكاد تكون منعدمة بس على الأقل اخدت الموضوع بجد واحترمت نفسها و الناس واشتغلت – بفلوس قليلة ودعم ضئيل – فى البلد وراحت هنا وهناك

جاى قبل الانتخابات بكم شهر تقول هرشح نفسى، وزعلان انك مالميتش التوكيلات ورايح تاخد 30 توقيع من البرلمان عشان ترشح نفسك و يدعموا المرشح الشاب؟

على رأى اللمبى: "وانتم اذكرتش ليه طول حياتك؟"

وبوستر "اعتبره اخوك" ده بجد ابو كده يعنى. سيس و ملزق وشحاتة شحاتة يعنى

مع السلامة خالد على

موسى بصراحة عامل حملة ناجحة ماقدرش اقول لأ، بس النجاح اللى انا شايفاه مرض فى البلد. نجاح مؤسسات كتير ناجحة عشان مستمرة مش عشان منتجة.

موظف مصرى محنك هاضم المكاتب فى مصر وعارف ازاى لو عينوه مدير يمشى الدنيا بحيث ان الشركة ماتفلسش وماتقفلش.

لعب على خوف الناس من الإسلاميين كويس اوى، وبعدين لعب على كل اللى خايف من الثورة و الثوار كويس جدا

وده مش وحش و هياكل مع ناس كتير اوى، بس انا زى ما قلت لكم مش عايزة آخد قرار على اساس خوف

موسى انا ارفضه لإنه

من رجال النظام السابق

لان كتير من مواقفه كوزير خارجية انا ضدها

ولانه من الآخر ماعندوش جديد يقدمه، هو اللى بيبيعه انا مش عايزاه اصلا و مانجحش يقنعنى انى محتاجاه بالعكس.

كل اللى عنده ان هايضمن ان الدنيا تفضل زى ما هى. لا الثوار هايبهدلوا الدنيا ويعملوا فوضى وكل يوم مظارهة، ولا الإسلاميين هايقلبوها قندهار ....

 ايوة هو ده حلو بس انت بقى هاتعمل ايه؟؟؟ انا هخليهم مايعملوش

وانت هاتعمل ايه؟ هاتأكد انهم مايعملوش

ايه "أد التحدى" دى؟ ماتعرفش على رأى سامية جاهين ان حتى العامية ليها قواعد؟

شكرا عمرو موسى

حملة شفيق بجد بقى كانت جامدة فى هزلها. هى كمؤسسة عملت زى المطعم اللى تعب اوى فى تكوين هوية تسويقية قايمة على اننا "بتوع الزباين الشيك اللى بيقرفوا بسرعة و خلقهم ضيق" ... هم بجد تعبوا اوى

وهو لو شفيق مرشح نفسه عمدة القطامية هايتس اللى هو ساكن فيها كنت انا نفسى هاروح للناس هناك اقول لهم يالله اتكلوا على الله.

بداية من اختياره لنقط نجاحه اللى هو المطار اللى 3\4 المنبهرين بيه يا اما سواقين تاكسى شافوه من برا بس، يا اما الناس اللى اتفرجوا عليه فى الأفلام، يا اما الناس اللى سمعوا انه حلو ففرحانين ان الأجانب بيشوفوا الوجاهة دى... من باب كركب الشقة جوا بس الصالون يبقى بيلمع.

وهنا برضه دى مش مؤسسة تدل على نجاح مقنع. وان كانوا الناس يحسب لهم انهم برضه عرفوا زبونهم و عمالين يدلعوه.

ولانى انا مش من المنبهرين بالمطار ده انا اصلا معرورة منه

ولان انا مش شايفاه امور لانه ابيض، ولا شايفة تقل لسانه قلاطة بالعكس شايفاه حاجات كلها مش قد كده

ولانى بجد شايفة ان الستايلست بتاعه فاشل، واللى بيدربه على الكلام ممكن يطلع ف الآخر واحد من الثورة بيشتغل ضده من تحت، لإن الراجل فعلا مش بيعرف يتكلم اصلا و بيقعد يترعش و يتهته بشكل فوق المفضوح

فانا ممكن يعنى ابقى ابوس البوستر والف بيه بونبونى

نيجى بقى لحمدين صباحى

حملة حمدين حملة ماقدرش اقول انها مش ناجحة بالعكس. هم لعبوها لو بروفايل لفترة طويلة جدا وده فى حد ذاته تكنيك مش مرفوض بالعكس، هى ممكن تبقى فهم كويس لمواردهم واللى معاهم و يعرفوا يلعبوا بيه

حمدين بقى عمل اللى عكس شفيق

عمل عربية كشرى بخشب مدغدغ ومكسر وعمال يقرب من القشر ويتصور جنبه عشان يتمنظر بقد ايه هو كده بقى "واحد مننا" وكأن احنا مالناش علامة غير اننا فقرانين و معفنين

هو ده اه موجود وكتير. بس هو التركيز عليه و استخدامه والمتاجرة بيه بل واخده منبر و مبدأ لا يحاد عنه هو اللى انا ضده

يعنى ايه متاجرة بيه؟ يعنى مثلا اما اتزنق و اضطر يقول انه كان عيان حورها فى انه عشان "واحد مننا" جاله بلهاريسيا و فيروس سى. سياسيا ارجع واقول انه عرف يباصى الكورة وحاول يجيب بيها جول، يمكن مش معايا بس هيعرف مع غيرى عشان كذبة على مزاجهم و لاعبة على وتر عندهم.

انا شخصيا رغم انى اكثر ارتياحا للتيار اليسارى واغلب صحابى يساريين، لكن طول عمرى متحفظة على حساسية اليسار من مظاهر العيشة الكويسة، وكأن المشكلة فى ان فلان عايش كويس، مش فى ازاى نخلى بقية الناس زيه.

فى يوم كان هو اللحظة الفارقة بقى، اما بدأت الحملة تتجه بقوة اكتر للسوشيال ميديا.

وحطوا صور الحملة على الفيسبوك... انا الحمد لله اتأكدت انى مش عايزة ارشحه ابدا

الصور فكرتنى بمكاتب شئون الطلبة عندنا فى الجامعة ايام ما كنت الدراسات العليا بتتجدد فكل الموظفين كانوا فى مكان واحد.

لالالالالا

هو ان كان على النجاح فشئون الطلبة ابطال بصراحة و بيعملوا كمية شغل ان كان هم ولا الدراسات العليا ومحدش يقدر يقول ان دول بالذات مابيشتغلوش. شغلهم بيروقراطى مش عاجبنا حاجة، وانهم مش بيشتغلوا حاجة تانية.

طبعا لان الحظ اكرمنى بإنى كان ليا مزاج اتصاحب على الناس دى واقعد جنبهم واتكلم معاهم وكده، فانا عارفة هم قد ايه فعلا عليعم "كمية" شغل كبيرة. ليها لازم بقى ولا مالهاش ده موضوع تانى

لا دى مش بس مؤسسة مش ناجحة، دى من اهم اسباب ان البلد دى بتروح لورا.

دى نوعية الشركات اللى لولا كم موظف فيها هم اللى فيهم الرمق كانت وقعت من زمان

نوعية الشركات اللى اسامى الأشخاص فيها بتفرق اوى

وده منطقى لكيان رأسه اصلا واخد اتجاه السياسى على اسم بنى آدم تانى

لا شغل الشركة دى مش عاجبنى اطلاقا

ليه مش هرشحه غير كده، م الآخر كذبة مش لادد عليا:

دعمه المعنوى والفكرى المعروف لصدام و القذافى – على فكرة زيه فى دى زى محمد صبحى ومصطفى بكرى

فى حاجة فيه نفسه مش مريحانى خالص. لما شوفته بيتكلم قلبى انقبض كده و قفلت منه تماما. ماصدقتوش بالمرة

لست ادرى قالت لى شفايفه، ودعاء سلطان قالت ضحكته..مش عارفة بس مش مريح

حتة ال"أنا" عنده عالية زيادة عن احتمالى

وطبعا اما جه يتكلم فى الإقتصاد قلشت منه تماما : "نظام اقتصادى اشتراكى رأسمالى يقوم على السوق المتعاونة" حاجة كده مالهاش اول من آخر

نهايته ان نظام طريقة شغل موظفينى بيروقراطى من بتاع اللجان المنبثقة عن لجان ده اللى ودانا فى ستين داهية

استنوا هاروح آكل و اكمل عشان جعت

*راديكالية جاية من راديكال اللى هى الأصل او الجذر اى حل الأمور من جذرها تماما حتى لو معناه اننا نقلعه من الأرض و نزرع غيره