Monday, June 20, 2011

التحرش من البيت ... اول الحدوتة


-->


ازيك يا ايفا
اصل ايفا حبيبتى ربنا يخليها لى فكرتنى فى وسط اليوم الامور ده انى ماينفعش اعيش دور المخنوقة النهاردة بالذات.


من ساعة ما عرفت موضوع يوم التحرش وانا بفكر اكتب فى اليوم ده مخصوص بوست واحد ازاى, مش هاينفع ... ده موضوع ممكن اعمل له مدونة لوحده!


نيجى لأصل الحدوتة ...


بيسألونى كتير اشمعنى يعنى حوار "العنف – الاسرى – ضد المرأة" ده اللى واجعة دماغك بيه وشايفاه هو يعنى الضمان الوحيد لحياة افضل للناس جميعا مش الستات بس.


هحكى لكم قصدى. الموضوع وما فيه, انى شايفة ان مناهضة العنف داخل المنزل ضد المرأة هى السبيل الوحيد الممكن واقعيا لتجنب اى وكل مشكلة بتتعرض لها المرأة فى مجتمعنا, و للناس فى المجتمع ده.


نيجى عند مشكلة التحرش, و اشرح لكم تطبيق عملى حالا


دلوقتى اصلا العنف ده يعنى ايه؟ العنف ده هو كل اذى ممكن انسان يسببه لانسان. يعنى مش بس الضرب المبرح واللمس والسباب وكده. لأ, الامتهان عنف, السيطرة الخانقة عنف, المراقبة والتصنت عنف, السيطرة على الاموال عنوة عنف ... كل واى شكل معاملة غصب عن الشخص او استغلالا لضعفه وعدم قدرته على الرد عنف!


التحرش بقى يعنى ايه؟
التحرش هو التعرض من الآخر ... ايا كان شكله
يعنى اى نوع من انواع التصرفات اللى يتحط فى خانة ما هو عكس "سيبها فى حالها" هو تحرش. سواء كان كلام او لمس او نظرات او اى شىء من ذلك.


ايه العلاقة؟


المأساة الحقيقية عندنا فى مصر – واعتقد فى باقى الدول العربية – هى اننا مجتمع مستبيح للمرأة. يعنى عادى اوى ان بنت تتهزأ, منطقى جدا ان بنت تتكسر مقاديفها, مش غريب اطلاقا ان تتهز ثقتها فى نفسها.


جاوبونى كده:


- ينفع البنت اللى اتربيت فى بيت بتتلطش فيه "التلطيش العادى ده" فى الرايحة و فى الجاية, انها فعلا تغضب لو واحد فى الميكروباص مد ايده على فخدها؟
هى بتدايق, بس رد فعل الاول الطبيعى عندها بيكون سكوت, مش انفجار لانتهاك حرمة جسدها. و ده بيولد عند اللى عمل فيها كده نوع من انواع انه "العادى" مش اشكال.


-ينفع بنت اتشتمت اما اتردمت شتيمة من ابوها و اخوها و عمها على انها "ست" و لازم ماتجريش ولا ماتقعدش كده ولا ماتلبسش كده ... انها تصوت و تلم الناس على واحد قرر انه يعلق بصوت مسموع على صدرها؟
برضه هتدايق, لكن اللى بيحصل انها فى الاساس متعودة ان فى حد بيبص على تفاصيل جسمها اولا, و انه مش شىء غريب خالص انها تسمع الفاظ بذيئة ثانيا.


- هل متوقع من واحد اتربى فى بيت الست فيه امه اللى بتتشتم عشان نسيت تجيب الملح, و اخته اللى بتاخد قلم على وشها عشان ردت رد "مش عاجب باباها" و هى "بنت" و طبعا "البنت لازم تكون مؤدبة" ... ينفع ده بذمتكم من جواه فعلا يحترم الستات؟
لو هو ربنا رايد له خير, ممكن لو حاول و قرا و فهم, احتمال يتغير. بس الغالب انه هايبقى من جواه "مستهين" بالمرأة, و لو احسن من كده, هايبقى بيتعامل كويس بس الاصل عنده ان المرأة اقل. و الاحسن اوى يعنى, اللى هاتلاقيه بيصارع نفسه فى ده طول الوقت.
و طبعا هنا ماقصدش ان كل الرجالة لازم يبقوا حاجة من دول




الفكرة فى مجتمعنا فعلا هى ان المرأة "شىء" مش انسان. و قبل ما تقولوا لى بطلى كلام جمعيات حقوق المرأة ده فكروا فى الكلمة لمدة عشر ثوانى.




ما هو لو الراجل فعلا متربى على ان الست بنى آدم زيه, مستحيل "يقدر" يجيب عينه ناحيتها. اللى بيعمل كده بيبقى مستبيح الشىء ده, مستهون بيه و مستضعفه, مستقل بيه و شايف انه – عشان راجل – فهو من حقه يطلع بنظره خارج مجال البصر العادى و يبص على صدر واحدة معدية فى الشارع, و من حقه انه "يبقى له رأى" فيه.




كل ما راجل بيعمل عملة من العمايل دى, اوتوماتيك باتخيل امه فى البيت!
- اللى بيبص عليا من تحت و انا نازلة من الميكروباص اكيد امه ست اتعودت تتحنى فى بيتها عشان الدنيا تمشى.
- اللى بيبص لواحدة من فوق لتحت و يقول اى كلمة و هو بيضحك, ده امه ياما قبلت ان ابوه يتريق على جسمها و يدايقها و هى ساكتة.
 - كل واحد بيقف لى بعربيته و يقول لى تعالى, عينى على طول بتتصور ابوه و هو قاعد بياكل و امه بتخدم عليه و هو بيشخط فيها و يهينها, و يضرب اخته عشان غرفت الطبق مليان و اتدلق منه حبة.
- كل سواق ميكروباص بيقعد يعلق على كل ست هو معدى جنبها, و كل ست ركبت بعد ما تنزل, باعرف على طول ان امه و اخته و مراته و بنته اتبهدلوا شتيمة ... و سكتوا و قبلوا.




دى بقى النقطة ...


"سكتوا ... و قبلوا"




* انتى ممكن تكونى ماخترتيش اهلك و لا البيت اللى اتربيتى فيه, بس تقدرى تختارى بيتك و التربية اللى هتربيها لعيالك
* انتى ممكن تكونى مش هاتعرفى تغيرى تربية رجالة بالكوم فى البلد, لكن تقدرى تكبرى ابنك فى بيت الست فيه بنى آدم له احترامه
* انتى جايز ما تقدريش تغيرى صورة المرأة فى ذهن كل الرجالة, لكن تقدرى تربى بنتك "محترمة" من جواها و هى هتجبر الكل يحترمها.




لو كل ست فينا فكرت فى الموضوع انها فى ايديها تربى راجل واحد و ست واحدة – لو يعنى خلفت اتنين – على كده, صدقونى هتتحل!


بس عشان تعرفى تعملى كده لازم من الاول تشغلى مخك و انتى بتتجوزى.
اللى يعاملك وحش مايستاهلكيش
اللى يهينك لا يمكن يكون بيحبك, "الراجل" – مش اى كائن آخر – اما بيحب بيبقى عايز الست تبقى هانم. اصلها بالعقل كده, اما هى تبقى هانم, يبقى هى متجوزة مين؟
اما بتقبلى الاهانة قدام عيالك بتكسريهم ... ايوة ... افهمى بقى!


تانى


اما بتقبلى الاهانة قدام عيالك بتكسريهم!


غير كده هنفضل نعانى و نصرخ و نصوت بعلو حسنا "والله بنى آدمين" و محدش حيدرى بينا.





Friday, June 17, 2011

إلى المشاركات في ثورة السعوديات


 
النهاردة يوم حلو ... النهاردة يوم جميل!

النهاردة يوم ثورة ستات السعودية على قانون منع قيادة السيارات. النهاردة – دلوقتى – كل الستات اللى عندهم رخصة سواقة دولية – سواء سعوديات او لأ- هيسوقوا فى شوارع السعودية فى تحدى للقانون الظالم ده.

تحياتى و احترامى للستات الشجاعة دى

ربنا معاكو يا رب

Friday, June 10, 2011

الفيديو القنبلة ... الحرس الجمهورى و المؤامرة ... و حقيقة موقعة الجمل


الفيديو القنبلة ... السبق اللى مفيش زيه ... حصريا!!!

الكلمات دى – اللى فقدت معناها تماما – استخدمت فى فيديو على اليو تيوب لمقطع من برنامج الناس بوك – اسم سخيف اوى على فكرة – لهالة سرحان.

الفيديو مفروض يعنى بيكشف عن فضيحة غير مسبوقة فى فيديوهات فيها معلومات حصرية ملهاش بقى مثيل فى الدنيا.

الفيديو اهه. استئذنكم تشوفوه للآخر لو امكن.


شوفتوه؟


الفيديو من الآخر قلب المواجع, و فكرنا باللى مش عارفين ننساه اصلا.

و المؤامرة, و الجريمة الوحشية, و الخيانة.

و الحرس الجمهورى اللى تآمر ضد شعب مصر يوم موقعة الجمل!!!!!

المشكلة مش فى اى حاجة غير انه بيقول كده و هو جايب صور فيديو فيها الشرطة العسكرية! هههههههههههه

طب يعنى عايز تضحك علينا ماشى بس مش بالوضوح ده!
لأ و ايه؟ "و هأقدم بلاغ ضد رئيس الحرس!!!" .... لا يا راجل؟!

هو اصله حاجة من اتنين:
-يا فاهم و قاصد يلفق و يكدب علينا لأى سبب بقى,
-يا مش فاهم و طالع فى التليفزيون يفتى فى الجيش و اسلحة الجيش و نحاكم مين و الكلام ده كله.
و الحالتين صراحة عك رسمى.

و استنوا قبل اى قفز لأى استنتاجات. ده منظر الحرس الجمهورى:


شايفين اى خوذة حمرة؟ لأ
عشان الحرس مش بيلبس الخوذة الحمرة دى خالص ولا بيريه حمرة - بيريه ده اللى هى البرنيطة بتاعتهم دى.

واضح طبعا انه غير المنظر اللى فى الفيديو خالص. مش شبهه حتى!!

و ده منظر الشرطة العسكرية:


و ده منظر شرطة عسكرية فى وسط سلاح تانى من الجيش. شايفين الاحمر؟
الخوذة - هى مش موجودة هنا - و البيريه, و الكتافة --- كله احمر

هو اصلا ده اللون بتاعهم, مفيش حد تانى عنده احمر كده.





و ده منظر الشرطة العسكرية و هى بتفض اعتصام التحرير يوم 9 مارس بالقوة



و ده منظر رامى المطرب الشاب ايام الاعتصام, و بعد ما الشرطة العسكرية – ربنا يكرم اصلهم كده – قبضوا عليه و ضربوه و سففوه التراب و كهربوه



يعنى مشكلتنا بأى حال من الاحوال مش مع الحرس اصلا. لو انا فاكرة صح, احتكاكنا الوحيد حتى الآن مع الحرس كان يوم 11 و 12 فبراير اما روحنا نعتصم قدام القصر, و لو برضه انا فاكرة صح الحرس ماعملش حاجة لحد... مش كده ولا فى حاجة انا مش عارفاها؟
و قبل ما حد يقول انى بدافع عن "الجيش" و الكلام ده, انا بدافع عن حقنا فى اننا نجيبه من اللى خده مننا. مش نروح لواحد مالوش دعوة و نمسك فى رقبته, و فى الآخر نزعل اما نلاقى مفيش حاجة حصلت.

و هالة سرحان دى ايه دى كمان؟ طب انا ماعرفش فى يونيفورم الجيش و كده مش بافتى و باسكت و اسأل قبل ما انطق ... انتى ايه بقى؟؟ مش باين مفروض انك الاعلامية اللى مش عارف ايه؟ للدرجة دى مفيش اى مجهود للتأكد من المادة المعروضة و المعلومات اللى بتطرحيها للناس؟ و قبل ما حد يقول لى كان على الهواء و هى ماتعرفش, مش قد الهوا خلى برنامجك تسجيل يا استاذة. مش حتتهد الارض لو قلتى ماعرفش على فكرة.
و مين الاستاذ اللى طلع يفتى و يخبط و يرزع على الترابيزة و يحاكم و يتحاكم ده؟ مفروض انت ليك مصداقية بعد كده؟؟ ده حقوقى بقى يقعد فى ندوات و يفتى و احنا ناخد كلامه بقى بالذمة؟؟
هو احنا هنفضل كده مش حاسين بقيمة الكلمة اللى بتطلع من بقنا و حجم المسئولية بتاعتها؟؟


و معلهش بقى عتب ع الجيش: ما انتوا السبب!
اه
ما انتوا اللى اخترتوا تستخبوا تحت الارض محدش يعرف عنكم حاجة مننا و خليتوا اولا فى حاجة اسمها "احنا" و "انتم", ماحناش واحد. و ثانيا سامحين بقى لكل واحد يطلع يعبط بأى كلام و يهبل و يتهم.
ده انا حاولت الاقى صورة تانية للحرس الجمهورى ماعرفتش, زى ما يكون انى اعرف لبس الحرس الجمهورى ده كده انتهاك للسرية الحربية
انتوا ناقصين اتهامات؟ ده انتوا منظركم الحمد لله مش لطيف خالص اصلا!
مش كفاية خيبة املنا فيكم؟
ده انتوا كنتوا الامل اللى عندنا بعد ربنا فى وقت من الاوقات, و انا كنت فى التحرير اما حد يقول كلمة عليكم ادااااافع, و اقول الجيش المصرى لأ!
آدى الشرطة العسكرية خليت شكلكم نيلة خالص. الا بصحيح هم الشرطة العسكرية دول بيتدربوا فين؟ شكلهم كده كانوا بياكلوا من ساندويتشات الداخلية و هم فى المدرسة.
ده انا بقيت كل ما اعدى على اشارة من اللى فيها كابينة شرطة عسكرية و جواها عسكرى واقف, قلبى ينقبض زى الداخلية بالضبط!
لا شوفوا لكم حل فى الشرطة العسكرية دول بسرعة لو سمحتم.
و انا لو من الحرس, ارفع قضية على عمنا ده هو و طنط هالة, خليهم يتعلموا يفهموا الاول بيقولوا ايه قبل ما ينطقوا.


نبجى بقى للى حصل يوم 2 فبراير:
اللى حصل فى موقعة الجمل ده من الآخر ان المصريين كانوا بيتقتلوا لمدة 48 ساعة متواصلة بوحشية و تقريبا كله كان بيتفرج!
آه كان عشمنا فى الجيش كبير
و اه مانعرفش فى اختصاصات الجيش و تفاصيله
بس الموضوع مش محتاج اصله, ناس راكبة مش عارف ايه و داخلة بسيوف و كرابيج و سلاح ابيض على عزل نايمين ع الارض و اطفال و ستات!!!
ايه؟
محتاجة مهارات تكتيكية دى عشان تتفهم؟
محتاجة خبير لوجيستى عشان يحلل و يفسر و يدى اوامر؟؟

دى عاملة بالضبط زى كده اما اكون ماشية فى الشارع معدية قدام مبنى جيش و الحراسة بتاعته قدامه و واحد ييجى يتهجم عليا, يغتصب و يقتل ... و الحراسة بتتفرج عشان مفيش اوامر!!!
ماشى انت ممكن دفاعك انه مش اختصاصك و مفيش أوامر, و كلامك فيه منطق مريحك و مقبول عند كتير
بس ماتستناش انى مش هانسى فى يوم البنى آدم فى الاول و الآخر اللى قعد يتفرج عليا, و العسكرى المتدرب اللى معاه سلاح اللى "اختار" يتفرج.
من الآخر كده ... احنا خاب املنا فيكوا!


و متشكرين على كده

و احفظوها بقى: خوذة حمرة = شرطة عسكرية = عدو