Thursday, April 28, 2011

طب و ليه جر الشكل ده؟

مظاهرة ضد قوانين سوزان مبارك للأسرة

تظاهر العشرات من المتضررين من قوانين الأسرة أمام نقابة الصحفيين، مساء اليوم، مطالبين بإلغاء قوانين الأسرة التي وضعتها سوزان مبارك، ومنها قانون الرؤية والحضانة والاستضافة، ووصفوها بأنها باطلة ومخالفة للشريعة وفقًا للمذاهب الأربعة، وأدَّت إلى إفساد الحياة الاجتماعية في مصر.

المصدر: اخوان – الشر برا و بعيد – اون لاين

همممم ... شكلكوا كده ناويين ع الشر, و مش حتجيبوها لبر

ليه كده طيب؟ و اما تزعلوا الستات يبقى كويس؟

ده اول امبارح الموضوع اتطرح فى منشية ناصر, والله ما تعرفوا الستات قالوا ايه! ده فى منتقبة حاليا بتحضر اليفط!!

نتكلم جد شوية ... بلاش

يعنى حقيقى بلاش

مش كويس علشانكوا

بصوا ... احنا فضلنا فترة طويلة فى حياتنا عندنا كمية مهولة من الفجوات مش الثغرات القانونية فيما يتعلق بالاحوال الشخصية. و فيـــــــــــــــــــــــــــــــــــن, بعد عذاب سنين بدأ الموضوع يتحسن شوية. و قدرنا نوصل لمرحلة ان القوانين بدأت تبقى نوعا ما احسن, لكن المشكلة فى تطبيقها.

خلينا نتكلم كده بالراحة. قانون الحضانة مثلا: عايزين ايه؟ هو لما بنقول حضانة الطفل لامه, بندى امه جايزة ولا بندى الطفل حقه؟ ما هو لو على الجميع, الكل نفسه العيال تعيش مع الاتنين ... لكن خلاص, الطلاق حصل و خلصنا. العيال بقى اللى انتوا جيبتوهم يعيشوا سعداء بيكم و بسبب وجودكم دول, حيعيشوا فين؟

مش القانون بيقول لو الست اتجوزت, الحضانة بتنتقل لامها؟

عايزين ايه؟ عايزين طفل عنده 7 سنين يعيش مع مرات ابوه و امه عايشة على وش الدنيا؟؟ انتوا ايه فى ايه؟؟ مالكوا؟؟

يعنى انهى اقرب لطبيعة الكون؟ انه يعيش مع امه و يشوف ابوه ولا العكس؟

7 سنين؟؟ 7 سنين يا ناس؟؟ يعنى فى تانية ابتدائى؟؟ يعنى ما شاء الله. كوكتيل بقى من فقدان الامان على عدم الثقة بالنفس, على حبة مشاكل سلوكية كده لانه عايز يلفت النظر, على شوية عنف و عدم تركيز فى الدراسة من كتر الخوف اللى جواه.

مش كفاية ان احنا ليسة عندنا الطلاق الغيابى؟؟ يعنى الست لا بيها ولا عليها تلاقى ورقة طلاقها جاية لها كده فى ايد واحد ماتعرفوش؟

انتوا ماسمعتوش عن هبل اسمه انذار الطاعة؟؟

مش القانون فى الاصل - و المبنى على الشريعة - يلزم الزوج و المأذون بان الزوجة تعرف بان جوزها اتجوز واحدة تانية؟؟ تعرفوا القانون ده بيتم التحايل عليه ازاى من قبل الاتنين؟؟
ليه الست ماتكونش توقيعها بالعلم و الموافقة شرط عشان جوزها يتجوز واحدة تانية؟؟
مش ده شرع برضه؟؟

انتوا فتحتوا على روحكوا فاتوحة و الله مانتوش قدها 

ما تستهدوا بالله كده

بعدين ارحمونا بقى من تمحيككوا فى الدين ده! كأن الدين ده نزل بس عشان نشوف ننكد ع الستات ازاى و نقهرهم. والله الدين مش كده, و الاسلام بالذات مش كده.

طلعونا من دماغكم

و طلعوا فكرة انكم حتستخدموا الدين حجة عشان تنكدوا علينا عيشيتنا بيها. لأ ... لأة!

الدين ده بتاعنا زى ما هو بتاعكوا, و عشاننا زى ما هو عشانكوا

و مش موجود عشان تقعدوا انتوا تنكشوا فى اشباه احاديث مشكوك فيها و تلوين كلام عشان تكسبوا مواقف شخصية لاهدافكم.

نفسى انسان بس يقول لى جابوا منين حوار 7 و 9 سنين اللى بيقولوا عليه فى الشريعة ده؟؟ انهى شريعة؟؟
شريعتكوا انتوا!

شريعتكوا اللى ماكانش فيها خلع ايام ما كانت المطالبة بيه موجودة. شريعتكوا اللى كانت عايزة الست تفضل عايشة مع راجل بالعافية بس عشان ما يبقاش للست حق الكلمة فى حياتها! انتى هنا بتاعتى, و انا اللى اقول امتى تمشى

الستات هتعرف تفك من جوازة مش عاجباها من غير ما تتذل للراجل؟؟؟ يا خراشى!!! واااااسلامااااااااه
بصوا ... حقولها لكو تانى و اجرى على الله: بلاش معانا احنا اللون ده, تراجعوا

مش حلو صدقونى

و عشان بس الامور تبقى واضحة, حتعملوا مظاهرة فيها 20 راجل ولا 200, ربنا ما يوريكوا بقى زعل الستات اما يتفقوا ع الرجالة. هو انا اللى هقول لكم؟؟ ههههههههههههههه

هى بس الميزة الوحيدة, ان دى احتمال تكون بداية نهاية التواجد الحقيقى للاخوان و الجماعات فى مصر ههههههههههههه

تخيلوا كده الستات فى منطقة ما يعرفوا الحوار ده, و ييجى بعد كده اخواننا المسلمين – بسم الله الرحمن الرحيم – يعملوا مؤتمر شعبى فى المنطقة دى .... ههههههههههههههه يا حلاوة!!


بلاش ... عشان العروبة بقول لك بلاااااااااااش

Tuesday, April 26, 2011

مبادرة تكريم ... التى تستحق التكريم


فكرة حلوة اوى و مبادرة رائعة بدأت من عام تقريبا تهدف لتسليط الضوء على ابداعات العالم العربى و تكريم كل عربى ناجح و يستحق التكريم.

المبادرة تهدف فى الاساس الى كسر الصورة النمطية المغلوطة عن العالم العربى عند العال الغربى – و فى رأيى ايضا عندنا – اننا شعوب لا تعلم شىء عن مختلف العلوم و ثقافات و مختلف نواحى الحياة. قالحقيقة ان عالمنا العربى ثرى بنماذج عديدة لا نعلم نحن عنها شيئا و لا نستفيد من اضافاتهم, و لا يحظوا بمايستحقونه من تكريم – و من هنا كانت مبادرة تكريم

تكريم لجمالها انها لا تهدف فقط الى تعريف العالم العربى, بل هى فى الاساس موجهة لجميع انحاء العالم.

مبادرة تكريم هى مبادرة رافضة للتمييز بكل اشكاله, تدعم التجربة الانسانية العربية و تقدرها. و تسعى للوصول بكل نابغ الى حصوله – و حصول مجتمعنا معه – الى ما يستحقه من تقدير.

المبادرة تكرم المبدعين و المتميزين فى عشر مجالات هى:

تعزيز السلام - أعمال الخيرية والخدمات الإنسانية - إمرأة العام العربية -
المساهمة الدولية الاستثنائية في المجتمع العربي - الإبتكار في مجال التعليم  - المبادرين الشباب -
التنمية البيئية المستدامة - الإنجاز العلمي والتكنولوجي - الإنجاز الثقافي - القيادة البارزة للأعمال



فى مشكلة خاصة بأكاونت التويتر اول ما تتحل هحطه هنا ان شاء الله

يا ريت يا جماعة كلنا نساند المبادرة الجميلة دى, و نساهم يالرأى و بكل ما يمكن ان نساهم بيه. تسليم الجوايز حيكون السبت اللى جاى ان شاء الله.

الاتحاد النسائى المصرى مش بتاع نوال السعداوى



نريد أسرة ديموقراطية لا سلطة مطلقة فيها لأى فرد الأب أو الأم أو غيرهما

كلام حلو اوى. مكتوب فى تعريف صفحة على الفيسبوك اسمها الاتحاد النسائى المصرى. بس عليه صورة نوال السعداوى!!! طب يعنى منين مفيش سلطة مطلقة لفرد و منين صورة الاتحاد النسائى هى صورة فرد؟؟ هو اتحاد نوال السعداوى مثلا؟؟

احنا خلصنا من صورة مبارك و مراته فىكل حتة عشان تطلع لنا صور ناس تانية بقى؟؟ مش حتخلص من موضوع تأليه البشر ده؟؟




فين صور المصريات المشاركات فى الثورة؟ زى ما عملت صفحة ائتلاف نساء الثورة؟ فين صور نساءمصر؟ فين صور شهيدات الثورة؟ مش من قلة يعنى!

بعدين ليه نوال السعداوى؟

دلوقتى مفروض اننا على كل خلافاتنا و اختلافاتنا الفكرية و المذهبية متفقين على مصلحة عامة اكبر و هى مصلحة البلد و بنحاول نشتغل سوا للمصلحة دى. و انا واحدة من الناس احب جدا اكون جزء من اى كيان يهدف لانصاف المرأة و مساعدتها فعلا. لكن فى فرق بين انى اشتغل مع حد انا مختلفة معاه, و انى اشتغل فى انى احقق رؤية حد انا مختلفة معاه. لأة بقى!

مضى عهد احتكار الرؤى. و مضى عهد احادية القرار. و مش من المفروض ان كيان بالحجم ده تحتكره ست واحدة و تربطه باسمها. خصوصا اما تشوفوا الصفحة الخاصة باتحاد نساء مصر فى المانيا اللى برضه بيسوق نفسه فى الاعلام الغربى بصور نوال السعدواى. نعم؟؟ نعم يعنى؟؟

لا بقى. انا ست فى البلد و احب ان الاتحاد النسائى المصرى مايكونش بتاع نوال السعداوى. انا ماعرفش هى شخصيا تعرف الموضوع ده ولا هو ناس بتحبها و واخداها مثل اعلى عاملينه. بس معلهش يعنى الحركة دى فى حاجات كتير اوى مرفوضة.

و تانى

الاتحاد النسائى المصرى مش بتاع نوال السعداوى

Tuesday, April 19, 2011

عاجل -- مجزرة فى حمص


 تحديث: المصدر: الجزيرة:
قوات الجيش السورى تقتحم ساخحة الاعتصام فى حمص و 4 ضحايا و عشرات المصابين. 
الجيش يعنى قلب على الناس و اخد صف بشار؟؟ هم شايفين الجيش اما بياخد صف الناس فى الاول, الناس بتعمل ايه؟ ده انتوا لو عملتوا البدع بعد كده محدش حيكلمكم.
يا رب
يا رب


عاجل --- الآن

فى مجزرة حاليا فى حمص السورية على يد نظام بشار الاسد القاتل. و فى انباء عن وصول مدرعات جيش فى 17 تشرين بالكورنيش حسب الصفحة الرسمية للثورية السورية فى الفيسبوك,.
بشار بيموتهم ببشاعة الآن

و الكل بيتفرج و ساكت

القنوات الفضائية حتى الآن موقفها فى منتهى الهزلية

فى ايه؟ الناس بتموت هناك؟ مالكوش نفس تشتغلوا ولا ايه؟ ولا هو ان الناس تموت فى سوريا دى مش مادة يعنى لاخبار و كده؟ لا ادينا ينقول لكم اهه


نريــــــــــــــــد اخبــــــــــــــــــــار حمص


وضحت؟؟

بصوا اللى فى ايدينا مش كتير, بس اهه اللى نقدر عليه

1-متابعة الاخبار فى الفيسبوك و تويتر. هو على فيسبوك فى صفحة رسمية و هى هنا. و على تويتر فى كذا اكونت زى ده و ده

2-استلموا اكاونتات التويتر بتاعت الفضائيات بقى من اللى ربنا يقدركوا عليه عشان يحسوا على دمهم. و آدى كده لطشة الاكاونتات مع الهاشتاج


3-اتصلوا بيهم عشوائى. على فكرة انا كنت باستهبف الحركة دى لحد ما واحد لبنانى كلمنى بيعيط ماعرفوش يوم 29 يناير, و بيشجعنا و يدعى لنا. والله كان شعور لا يوصف. ده غير طبعا العرب اللى اعرفهم يعنى.

هم الكود بتاعهم اهه
009639
then any digit between 2 and 9
then any random 7 digits

انا عمالة احاول بس عاملين فيهم الحركة اياها و قافلين الموبايل

يـــــــــــا رب انـــــــــــصر سوريا الحبيـــــــــــــبة




Sunday, April 17, 2011

صباح عربى جميل حر


يا صباح الحرية يا عرب!

اهدى البوست ده لأحرار سوريا ... يا رب انصر سوريا, سوريا كلها قايمة يا ناس ما شاء الله, ربنا معاهم

و برضه عندهم الاعلام بيقول ان مفيش اى حاجة يعنى دى خناقة اتنين متجوزين على مصروف البيت ههههههههههههههه

و برضه عندهم الوحشية و القهر و الظلم, و فشار الاسد بيفترى, مفيش مشكلة ابقوا انتوا حاكموه بس و احنا نشوف له سرير عندنا فى طرة. مانتوا عارفين بقى ان مبارك هيهيهيهي فى مستشفى السجن دلوقتى و عياله محبوسة ههههههههههههه


اجمدوا!! اجمــــــــــــدوا ... اصمـــــــــــدوا


ربنا كبير اوى, و كبير اوى ع الظلم

و هنفرح بيكم و نهلل لكم قريب اوى ان شاء الله



 
و تحية الى ثوار البحرين الشرفاء. اللى والله لو حد جه ناحيتى بكلمة عنهم, لا حيشوف منى رد فعل مش حيصدقه... شيعة بقى, بوذيين, مش شغلة حد فيكم, بلا بتاع بقى!

شباب البحرين الاحرار اللى واقفين قدام جيش تحالف الهطل الخليجى كله لوحدهم, عشان النظام الامريكى مساند التواجد الخليجى الذليل لهم.

ربنا يبارك لكم والله, و فعلا مقدرة شخصيا صراعكوا اللى حتى الجزيرة بتغطيه تغطية اسوأ من تغطية التليفزيون المصرى الحكومى لميدان التحرير!!

ظلم ... ظلم شديد و متحالفين ضدهم. و بيتعرضوا لابشع انواع العنف.
بس ولا يهمكوا, ربنا معاكم و ربنا اكبر من الكل, و فى الآخر ربنا مع الحق.
نيجى بقى لأعز الحبايب, المظلومة من زمان اوى ... الجميلة فلسطين!

فى ناريخ مهم اوى و هو 15 مايو اللى جاى ان شاء الله. بداية الزحف العربى للأراضى الفلسطينية المحتلة.

آآآآآآآآآآآه. اسرائيل. مش عارفة بقى دى ينفع معاها سلمية ازاى؟

و دى الاعلام بينقى يجيب ايه امتى على قناة ايه, الناس هناك بتموت عادى زى ما احنا بنخش الحمام كده.
والله ما ببالغ, واللى كانوا معايا يوم جمعة الغضب عارفين:

فى كذا لحظة فى اليوم ده, كان كل ما العنف يزيد, و صوت الرصاص, و قناصة من فوق, و غاز من قدام, و مدرعات بتدوس ع الناس. فى عز ما كنت فى وسط ده كله, كنت كل شوية الاقى صوت جوايا بيقول "هم الفلسطينيين عايشين كده بقالهم سنين؟ عادى كده؟ و بينضربوا الضرب ده كله و يقوموا؟ و يموت منهم و الواقع يقوم يكمل؟ قدام ابشع و اقذر و اقسى قوة خسيسة ع الارض؟ لوحدهم؟ عزل؟ اطفال؟ معقولة يا ربى؟!!

اليوم ده مهم اوى يا جماعة

 اتمنى كا واحد من كل بلد يقدر يروح يروح
و عموما احنا شباب الثورة بقى و فاهمين, حتى اللى مش فى الميدان و عايز يساعد ساعد. يعنى مش المرواح الفعلى هناك هو الشىء الوحيد اللى ممكن نعمله. اللى فى ايدينا مش قليل و نقدر نساعد بيه

-انترنت بقى ... انترنت بهبل. 
-الفيسبوك الله يخليهم و يبارك لهم شالوا الصفحة الاولانية للانتفاضة و اتعملت واحدة جديدة, و آدى اللينك بتاعها
-و التويتر لهم فيه هاشتاج اهه  3rdIntifada
-فيديوهات .... شير
-اخبار ... شير و ترجمة, مهمة اوى الترجمة ... لكل لغات الدنيا




يا رب انصر شباب العرب يا رب
 

الميــــــــــــــــدان

بقالى كتير ماعيتطش كده

ايه الجمال ده؟

كلمات العبقرى عبد الرحمن الابنودى و موسيقى المبدع راجح داوود و مونتاج و تنفيذ شلبى شحاتة. الابيات المكتوبة بلون مختلف هى اللى تم حذفها من نص الاصل عشان الاتساق الموسيقى. بس انا حبيت احطها كلها عشان تبقى موجودة كاملة


أيادى مصرية سمرا ليها فى التمييز

ممدودة وسط الزئير بتكسر البراويز

سطوع لصوت الجموع شوف مصر تحت الشمس

آن الآوان ترحلى يا دولة العواجيز

عواجيز شداد مسعورين أكلوا بلدنا أكل

ويشبهوا بعضهم نهم وخسة وشكل

طلع الشباب البديع قلبوا خريفها ربيع

وحققوا المعجزة صحوا القتيل من القتل

اقتلنى قتلى ما هيعيد دولتك تانى

بكتب بدمى حياة تانية لأوطانى

دمى ده ولا الربيع الاتنين بلون أخضر

وببتسم من سعادتى ولا أحزانى

تحاولوا ما تحاولوا ما تشوفوا وطن غيره

سلبتوا دم الوطن وبشيمته من خيره

أحلامنا بكرانا أصغر ضحكة على شفة

شفتوتش الصياد يا خلق بيقتلوا طيروا

السوس بينخر وسارح تحت أشرافك

فرحان بيهم كنت وشايلهم على كتافك

وأما أهالينا من زرعوا وبنوا وصنعوا

كانوا مداس ليك ولولادك وأحلافك

ويا مصر يا مصر آن العليل رجعتله أنفاسه

وباس جبين الوطن... مال الوطن باسه

من قبل موته بيوم صحوه أولاده

إن كان سبب علته محبته لناسه

الثورة فيضان قديم

محبوس مشافوش زول

الثورة لو جد متبانش فى كلام أو قول

تحلب وتعجن فى سرية تفور فى القلب وتنغزل فتلة فتلة فى ضمير النول

متخافش على مصر يا با مصر محروسة

حتى من التهمة دى اللى فينا مدسوسة

ولو أنت أبوها بصحيح وخايف عليها أوى

تركتها ليه بدن بتنخره السوسة

وبيسرقوك يا لوطن قدامنا عينى عينك

ينده بقوة الوطن ويقلى قوم,فينك؟

ضحكت علينا الكتب بعدت بينا عنك

لولا ولادنا اللى قاموا يسددوا دينك

لكن خلاص يا وطن,صحيت جموع الخلق 

قبضوا على الشمس بأيديهم ...

وقالوا لأ ... من المستحيل يفرطوا عقد الوطن تانى

والكدب تانى محال يلبس قناع الحق

بكل حب الحياة خوط فى دم اخوك

قول أنت مين للى باعوا حلمنا وباعوك وأهانوك

وذلوك ولعبوا قمار بأحلامك

نيران هتافك تحرر صحبك الممسوك

يرجعلها صوتها مصر تعود ملامحها

تاخد مكانها القديم,والكون يصالحها 

عشرات السنين تسكونوا بالكدب فى عروقنا

والدنيا متقدمة ومصر مطرحها

كتبتوا أول سطور فى صفحة الثورة

وهما علما وخبرة مداورة ومناورة

وقعتوا فرعون هرب من قلب تمثاله

لكن جيوشه مازالوا بيحلموا ببكرة

صباح حقيقى ودرس جديد أوى فى الرفض

أتارى للشمس صوت وأتارى للأرض نبض

تانى معاكم رجعنا نحب كلمة مصر

تانى معاكم رجعنا نحب ضحكة بعض

مين كان يقول ابننا يطلع من النفق

دى صرخة ولا غنى وده دم ولا شفق؟

أتاريها حاجة بسيطة الثورة يا أخوانا

مين اللى شافها كده مين أول اللى بدأ

مش دول شاببنا اللى قالوا كرهوا أوطانهم؟!

ولبسنا توب الحداد وبعدنا أوى عنهم؟!

هما اللى قاموا النهارده يشعلوا الثورة

ويصنفوا الخلق مين عنهم ومين خانهم

يادى الميدان اللى حضن الفكرة و صهرها

يادى الميدان اللى فتن الخلق وسحرها

يادى الميدان اللى غاب اسمه كتير عنه وصبرها

ما بين عباد عاشقة وعباد كارهة

شباب كأن الميدان أهله وعنوانه

ولا فى الميدان نسكافيه ولا كابتشينو

خدوده عرفوا جمال النوم على الأسفلت

والموت عارفهم أوى وهما عارفينه

لا الظلم هين يا ناس ولا الشباب قاصر

مهما حاصرتوا الميدان عمره ما يتحاصر

فكرتنى يا لميدان بزمان وسحر زمان

فكرتنى بأغلى أيام فى زمن ناصر

شايل حياتك على كفك صغير السن

ليل بعد يوم المعاناة وأنت مش بتأن

جمل المحامل وأنت غاضض

بتعجب أمتى عرفت النضال

اسمحلى حاجة تجن

أتاريك جميل يا وطن مازلت وهتبقى

زال الضباب وانفجرت بأعلى صوت ... لأة

حركتنا نبتسم ودفعت أنت الحساب

وبنبتسم بس بسمة طالعة بمشقة

فينك يا صبح الكرامة الا البشر هانوا

وأهل مصر الأصيلة اتخانوا واتهانوا

بنشترى العزة تانى والتمن غالى

فتح الوطن للجميع قلبه و احضانه

الثورة فيض الأمل وغنوة الثوار

الليل إذا خانه لونه يتقلب لنهار

ضج الضجيج بالندا اصحى يا فجر الناس

فينك يا صوت الغلابة وضحكة الانفار؟

وإحنا وراهم أساتذة خايبة

تتعلم ازاى نحب الوطن وامتى نتكلم

طال الصدى قلبنا ويأسنا من فتحه

قلب الوطن قبلكم كان خاوى ومضلم

أولنا فى الجولة, لسة الجولة ورا جولة

ده سوس بينخر يا أبويا فى جسد دولة

أيوه الملك صار كتابة إنما أبدا

لو غفلت عينا لحظة حيقلبوا العملة

لكن خوفى مازال جوه الفؤاد يكبش

خوف اللى ساكن شقوق القلب ومعشش

يقوللى مش راح يسيبه 

ولسه حيقبوا وحيلاقولهم سكك وببان ما تتردش

وحاسبوا أوى من الديابة اللى فى وسطيكم

حاسبوا أوى من الديابة اللى فى وسطيكم

وألا تبقى الخيانة منك وفيكم

الضحك على البق بس الرك على النيات

فيهم عدوين أشد من اللى حواليكم